आगामी आर्थिक वर्षका लागि सरकारले विभिन्न मन्त्रालयहरूमा बजेट बाँडफाँट सार्वजनिक गरेको छ।
सार्वजनिक गरिएको विवरणअनुसार विकास निर्माण र पूर्वाधार क्षेत्रलाई सरकारले सबैभन्दा उच्च प्राथमिकतामा राखेको देखिएको छ। पूर्वाधार विकास मन्त्रालयका लागि मात्रै ३ खर्ब २ अर्ब ५३ करोड ८२ लाख रुपैयाँ विनियोजन गरिएको छ, जुन सबै मन्त्रालयमध्ये सबैभन्दा ठूलो बजेट हो।
शिक्षा क्षेत्रमा पनि सरकारले उल्लेखनीय बजेट छुट्याएको छ। शिक्षा मन्त्रालयका लागि २ खर्ब १८ अर्ब ३० करोड ५० लाख रुपैयाँ विनियोजन गरिएको छ। यस्तै महिला, बालबालिका तथा सामाजिक सुरक्षा मन्त्रालयले १ खर्ब २२ अर्ब ६१ करोड ४३ लाख रुपैयाँ बजेट प्राप्त गरेको छ।
ऊर्जा मन्त्रालयका लागि १ खर्ब २४ अर्ब २ करोड ८२ लाख रुपैयाँ छुट्याइएको छ भने गृह मन्त्रालयले १ खर्ब ८ अर्ब ३२ करोड १२ लाख रुपैयाँ बजेट पाएको छ। स्वास्थ्य मन्त्रालयका लागि ९६ अर्ब ४३ करोड ६३ लाख रुपैयाँ विनियोजन गर्दै सरकारले स्वास्थ्य सेवालाई पनि प्राथमिकतामा राखेको संकेत दिएको छ।
कृषि तथा वन मन्त्रालयलाई ७३ अर्ब १२ करोड २१ लाख रुपैयाँ बजेट छुट्याइएको छ भने रक्षा मन्त्रालयले ६४ अर्ब ९६ करोड ७५ लाख रुपैयाँ बजेट प्राप्त गरेको छ। अर्थ मन्त्रालयका लागि ५४ अर्ब ७३ करोड ८८ लाख रुपैयाँ विनियोजन गरिएको छ।
त्यसैगरी भूमि व्यवस्था, सहकारी तथा संघीय मामिला मन्त्रालयलाई २४ अर्ब १४ करोड २४ लाख रुपैयाँ, पर्यटन मन्त्रालयलाई २० अर्ब ६३ करोड १२ लाख रुपैयाँ तथा उद्योग मन्त्रालयलाई ९ अर्ब ३४ करोड ४ लाख रुपैयाँ बजेट विनियोजन गरिएको छ।
परराष्ट्र मन्त्रालयका लागि ८ अर्ब ३७ करोड ५८ लाख रुपैयाँ छुट्याइएको छ भने प्रधानमन्त्री तथा मन्त्रिपरिषद्को कार्यालयले ७ अर्ब ४८ करोड ५२ लाख रुपैयाँ बजेट पाएको छ। सूचना तथा सञ्चार मन्त्रालयलाई ८ अर्ब १३ करोड ६० लाख रुपैयाँ तथा विज्ञान, प्रविधि तथा नवप्रवर्तन मन्त्रालयलाई ४ अर्ब ४ लाख रुपैयाँ बजेट विनियोजन गरिएको सरकारले जनाएको छ।
